Rebelions catalanas

Zizerón escribió en o sieglo I antis de Cristo que a Historia ye a mayestra d’a vida. D’ella replegamos as amostranzas que, alazetatas en a esperenzia d’o relato istorico, nos pueden ayudar a privar as errors pasatas y empentar os logros d’o futuro. Yo gosareba socherir dende una optica cuasi biolochica que as amostranzas d’a Historia son o nuestro codigo chenetico como presonas y como soziedaz. Parixereba que, mesmo esconoxendo ros detallos u buena cosa d’o recontallo d’o nuestro esdevenir anzestral, íste condiziona as nuestras autituz presens como si se preprogramasen reyazions instintivas, reflexas y automaticas que vendreban determinatas por bels cromosomas d’o nuestro seyer coleutivo.

Como apasionau d’a Istoria y, muito espezialmén, d’a d’Aragón, dende ista posizión de vizindat territorial y vinculazión istorica común que tenemos aragoneses y catalans, sempre m’ha faszinata ixa mena de tornadiza empenta rupturista que, de sieglo en sieglo, s’empara d’os esmos y voluntaz d’os nuestros vizins d’o Este. Cada pueblo tiene o suyo caráuter, os suyos rebatos, as suyas basemias, os suyos cudiatos y as suyas zaforosidaz. O sino de Cataluña parixereba estar o azogue d’o dandalo d’estar, d’un costau, á ra usma d’a estabilidat y seguranza que li premite aproveitar os autivos d’a suya cheografía y d’a suya zevilizazion ta ra suya prosperidat y lucro y, d’atro, a de l’autosufizienzia que l’escuse de bosar a servidumbre de fer-se á pachas con cualsiquier intrés d’os suyos sozios u vizins (y no digamos dominadors) que no s’acople á o suyo propio.

En ixa baruca vive dende os suyos orichens, cuan enzetó á forgar-se o que esdevenireba Cataluña en os tiempos d’a Marca Ispanica, en os sieglos VIII á X. En ixe tiempo fundazional, á esferenzia de pamploneses y aragoneses, os condes catalans fracasoron en as suyas esfugadas por secutir-sen-ne o dominio d’es reis francos, o que no lis presguardó d’as terribles algaratas musulmanas ni lis premitió progresar en a suya propia interpresa de reconquista como sí en fizioron leoneses, castellanos, navarros y aragoneses. A reconquista catalana no avanzó ni un palmo de terreno en tres sieglos. Ni sisquiera a penar d’o temprano floreximiento economico d’a viella Marca en un contesto de crexién predominio d’os condes de Barzelona sobre os atros condaus. Nomás estió á partir d’a unión d’Aragón y Barzelona en o sieglo XII (que, remeremos-lo, se atrazó como una fusión mutuamén quiesta ta asegurar a futura pervivenzia d’amos) cuan Cataluña escomenzó á ganar territorio a os musulmans dica alcanzar as suyas uegas autuals. Cataluña, á partir d’ixe momento y fueras d’a emologazión posterior d’ixa situazión de feito estatuezita por o tratau de Corbeil (1258), formalizó a suya ascrizión á una nozión cheopolitica d’a suya identidat claramén ispanica, crebando ros suyos ligallos más que más nominals con o mundo franco.

As consecuenzias d’ixa dezisiòn no podioron estar más enfortunatas pues en os dos sieglos siguiens Cataluña estió taute y benefiziata prenzipal d’a espansión mediterránia d’a Corona d’Aragón. Toda una “Edat d’Oro” catalana ideyalizata sieglos dimpués por a Renaixença que, á traviés d’un gran repertorio de chestas y eroes (asobén bella cosa empapuzato con referenzias no astritamén propias) farchan o panteón d’as ”glorias catalanas” de cualos recosiros s’ha alimentato ro esmachinario identitario, cultural y politico d’a soziedat catalana.

Sin dembargo, Cataluña dentró en una funda crisis economica y sozial dende meyaus d’o sieglo XIV, con un comerzio mediterránio cada begata más disputato por nuevas potenzias rivals y un crexién desasusiego en amplos seutors igual urbanos como rurals. Aragón, afeutato de traza indireuta á causa d’a suya susidiariedat economica con respeuto á o comerzio catalán pero tamién en contauto más direuto con Castiella e ixe mundo atlantico que escomenzipiaba á furtar-li a primazía economica á o Mare Nostrum, trobó en la debilidat politica de Cataluña una oportunidat ta resolver varios problemas de vez cuan se desató la crisis dinastica prevocata por a muerte sin eszendenzia de Martín l’Umano (1410). Asinas, en o Compromís de Caspe Aragón afavorexió claramén a entronizazión d’una dinastía castellana en alcanzando con ixo varios oxetivos azesorios á o prenzipal de recuperar la estabilidat politica pero de vital importanzia: (1) esplazar o zentro politico d’a Corona d’Aragón de Barzelona ta Zaragoza; (2) tratar de controlar á ra suya favor a politica castellana; (3) sacar-li á Franzia -a eterna enemiga d’a Corona d’Aragón- o suyo potente aliato castellano ta reemplazar asinas á Anglaterra, sozio abitual d’os aragoneses fren á o rei franzés (por aquers tiempos Anglaterra ya eba perdito Aquitania y yera estando redotata en a guerra d’os Zien Años); (4) aconsiguir un millor azeso á nuevos mercaus en Castiella y enta os puertos cantabricos, feito que tamién aproveitoron lumerosos mercaders catalans que s’establioron en suelo aragonés á ra usma d’ixe nuevo fluxo de navegos mercantils.

Si l’apuesta que senificaba iste chiro resultó á ra fin solo parzialmén satisfadera ta Aragón en Cataluña, manimenos, a situazión nomás fazió que empiorar y tornareba á autivar l’angluzia de buena cosa d’a soziedat catalana por buscar por a suya cuenta y de traza esligata d’a Corona d’Aragón a soluzión á os suyos problemas. A crisis politica entre Chuan II d’Aragón y o prenzipe Carlos de Viana con las banderías que enzurizó estió a purna que acabareba recutindo ta ra segunda gran fita independentista en a bastida d’a guerra zivil catalana de 1462-1472. En o navesar d’a mesma s’ufrió ro títol de conde de Barzelona y, por tanto, siñor de toda Cataluña, suzesivamén á Enrique IV de Castiella, Pietro de Portugal (condestable de Portugal y nieto d’o conde Chaime d’Urchel, o gran perdedor d’o Compromís de Caspe) y Renato d’Anjou. Diferens azars y o granizo esfuerzo melitar que replegó ro rei d’Aragón d’os suyos soxetos á ro largo d’una larga guerra acaboron malmetiendo as pretensions d’o sezesionismo. Pare-se cuenta de que, en tot momento, a nezesaria conzenzia de vulnerabilidat d’una “Cataluña sola” escartaba ra independenzia como resultato final: entegrar-se en atra corona siguiba estando a millor guarenzia ta mantener a propia presonalidat d’o país.

Un fallo de carculo en o difízil chuego d’alianzas matrimonials desarrollato primero por Chuan II y dimpués por o suyo fillo Ferrando II determinó l’advenimiento d’a dinastía Habsburgo á o trono d’Aragón en o sieglo XVI. A Corona de Aragón, que eba pugnato á ro largo de toda ra Edat Meya por no estar absorbita por a Corona de Franzia u por a de Castiella cayó dimpués d’a muerte nomás naxer de Chuan, fillo de Ferrando ro Catolico y Chermana de Foix, baxo a orbita d’un nuevo poder d’alcance europeyo que en a peninsula iberica teneba como verdadera plataforma a una Corona de Castiella, políticamén sozmesa dimpués d’o esmicazamiento d’a rebelión d’os Comuners (1520-1522). A tensión produzita por a incompatibilidat entre o sistema politico aragonés (pautista, garantista y parlamentarista) y a visión asolutista que manteneban os nuevos zésars d’a epoca iban a fer de tot ro sieglo XVI un tiempo de conflitos y pleitos de fundo calau entre Aragón y a corte de Madrid, que eba de tener a suya fuga en a invasión de 1591, l’asasinato d’o Chustizia Chuan de Lanuza V y as cortes de Tarazona de 1592, zelebratas baxo coazión armata. Conviene alvertir que se trató d’una rebelión de carácter constituzional (dito isto en terminos autuals), en la que s’oposaban os fueros y libertaz d’os aragoneses á ra voluntat albitraria d’un monarca (anque a pugna ya enzetó con o suyo predezesor) que s’enzenegó de traza terne en pasar violentamén por denzima d’una legalidat á ra que eba churato sozmeter-se y esfender ta estar reconoxito por os aragoneses como o suyo rei (“y si non, non”, seguntes susteneban os que compartiban as ideyas inspiratas por a leyenda d’os Fueros de Sobrarbe). Atra nota á ra marguin: una Cataluña alabez débil, particularista y marcolfa s’astenió d’achuntar-se en aquera ocasión á ra rebelión aragonesa, talmén no guaire conszién de quiénto se chugaba tamién en ixos suzesos, como os feitos futuros acabareban contrimostrando.

Consumata ra redota d’o forismo aragonés en 1591 a flama sezesionista catalana tornareba á enzender-se en 1640, en o contesto d’a guerra d’os Trenta Años, cuan Franzia drenta en o conflito y a monarquía ispanica se troba atosegata por o coste de mantener os suyos exerzitos. A carestía d’os produtos basicos, os abusos d’as tropas acantonatas en Cataluña, as presions d’a monarquía ta otener una mayor partezipazión d’os Estatos d’a Corona d’Aragón en o coste d’a guerra y en a provisión de tropas y a conflitividat sozial de toda una Europa en crisis esclató en a sublevazión dels segadors. Con a ziudat de Barzelona y varias comarcas de Cataluña dominatas por a furia d’os escontentos, a situazión s’eslampó ascape d’o control d’una Generalitat (presidita alabez por o canonche Pau Claris) que deseguida se metió á ra capeza d’a sublevazión. A respuesta represiva que se paraba dende Madrid levó á o gubierno d’a Generalitat á buscar a protezión de Franzia. En as negoziazions os franzeses desichioron que Cataluña cambease o suyo modo de gubierno á o de republica como condizión ta poder meter o territorio baxo ra protezión d’o sobirano franzés. Asinas se cheneró a creyenzia de que tal estió l’orichen d’a vocazión republicana de Cataluña que sustienen os seutors independentistas autuals. Dita republica duró nomás una semana pues a inminén arrivata d’o exerzito español á Barzelona obligó á ra Generalitat á azeutar una nueva desichenzia de Franzia: si os catalans quereban estar esfenditos por o rei franzés eban de reconoxer-lo como sobirano. Y asinas lo fizioron.

Siga como fuese, o causo ye que en os años d’a guerra (que se prolargó dica 1652) Cataluña se mantenió de nuevo en a orbita de Franzia, d’a que tanto eba luitato por espartir-se ueito sieglos antis. Estió una esperenzia traumanica y estronchinadera, en a que en poco tiempo ros franzeses contrimostroron no estar millors que os españols en o referén á cargas de guerra, violencia sobre a poblazión, impuestos y falta de respeto por as leis e instituzions de gubierno propias, dixando destruzions y enruenas en un país que, antimás, perdió parti d’o suyo territorio pues o Rosellón, o Conflent, o Vallespir y trenta y tres lugars d’a Zerdaña pasoron á pertenexer (y continan pertenexendo uei día) á Franzia.

Como consecuenzia d’o suzedito, en rematar o conflito a entena enta Franzia y tot ro franzés se mantenió viva en Cataluña y en Aragón -que sofrió durismamén en o suyo propio suelo as calamidaz d’a guerra dels Segadors- á ro largo d’a segunda metat d’o sielo XVII. Pero en tal estau de terizia o destín s’amostró de nuevo enarcadero ta ros soxetos d’o rei d’Aragón: a conspirazión urdita en a corte de Madrid ta aconsiguir que o suzesor de Carlos II fuese un franzés (ni más ni menos que Felipe d’Anjou, nieto de Luis XIV, o rei franzés más odiato y amedrentidero ta aragoneses y catalans) sembró de contrariedat y divisions o tono politico e instituzional d’a Corona d’Aragón. Ixas tensions y o trunfo d’as armas aliatas en o litoral mediterránio en as campañas de 1705 y 1706 alinioron á os países d’a corona aragonesa en favor d’o pretendién austriaco, que churó como rei d’Aragón en Zaragoza en chulio de 1706. Y una begata más s’enzendió en Cataluña a flama d’a rebelión esistenzial, si bien ista begata, por fortuna bien estrania, en esfensa d’a “verdadera” monarquía española que, con a zircunduzión d’os fueros aragoneses y valenzianos dimpués d’a invasión d’istos reinos en 1707 por Felipe V, se ligó definitivamén á ra ideya politico-territorial d’España que eba esistiu dica ixe inte. Un “aragonesismo austrazista” (asinas lo definió Ernest Lluch en o suyo estudeo sobre a obra de Juan Amor de Soria) que apellidaba á os alazez y esenzias constituyens “plurinazionals” d’a res publica española.

Cataluña, presguardata dica 1714 d’a suya finitiva conquista por as armas borbonicas grazias á ra suya situazión cheoestratechica litoral (por do plegaban refuerzos austrazistas), alueñata d’as uegas de Castiella por a interposizión d’o territorio “buchón” d’Aragón y relativamén protechita de Franzia por os Pirinés, se convirtió en a zaguera campiona de dito “verdadero” seyer politico d’España, espezialmén cuan os alcuerdos previos á ra Paz d’Utrecht menoron á ra retirata d’as tropas aliatas d’o suyo suelo. Cataluña, á penar de tot y contra tot, dezidió continar a suya zerrina resistenzia en solitario. Á penar d’as intripitazions más siescatas y “presentistas” de toz conoxitas, os decumentos d’a epoca no dixan puesto a mica dandalo sobre a motivazión fundamental que refirmó ro animo d’a resistenzia catalana. Baste nomás como exemplo ro prigón que fazió ro brazo d’os comuns (representans de lugars, villas y ziudaz, que en Aragón se denominaban “universidaz”) o mesmo día 11 de setiembre de 1714, calendata d’a capetulazión de Barzelona, en o que se fabla de

tots los mals, ruinas y desolacions que sobrevinguen á nostra comuna y afligida patria, y extermini de tots los honors y privilegis, quedant esclaus amb los demés enganyats espanyols y tots en esclavitud del domini francés; pero com tot se confía, que tots com verdaders fills de la patria, amants de la llibertat, acudirán als llochs senyalats á fi de derramar gloriosament seva sang y vida, per son Rey, per son honor, per la patria y per la llibertat de tota Espanya

En rematar a guerra y empezipiar a España unitaria y asolutista á ra que suzedereba o Estato-nazión zentralista español, o pulso politico particularista catalán se sondormió. A crisis constituzional que dio piet á ra revoluzión cantonalista de 1873 no podió revellar-lo guaire, anque fe-se a enchaquia de proclamar un Estato catalán drento d’a federazión española (proclama no separatista que tamién se dio en muitos atros territorios, Aragón incluyito). Tan moderada pulsión bien podreba esplanicar-se por por a remeranza d’a delera patriotica españolista que enzurizó á mils d’entusiastas catalans (y vascos) á alistar-sen ta luitar en a guerra colonial d’Africa de 1859-1860, una interpresa de gran intrés ta ra cada vez más prospera y enriquita burguesía d’o país, tan afavorexita por a formazión d’o mercau unico español y a politica aranzelaria d’os suzesivos gubiernos d’a epoca.

Pero o desasusiego economico y sozial de prenzipios d’o sieglo XX dispertó de nuevo á ro “bubo” en 1931, en meyo d’a eferveszenzia d’as eslizions monezipals que dioron paso á ra Republica Española y que Francesc Macià aproveitó ta proclamar a Republica Catalana. Á penar de que ro intento se reconduzió enta ro establimiento de l’autonomía catalana, a mesma declarazión sezesionista se fereba atra begata tres añadas dimpués por o president Companys como consecuenzia de un desalcuerdo con Madrid por a lei catalana d’achustes de cautivos. En ixa ocasión a suspensión de l’autonomía catalana se reyalizó expeditivamén y en meyando ro cañoneyo d’o mesmo palazio d’a Generalitat.

Y en os nuestros días, en abendo transcorritos tantos años, dimpués d’una guerra zivil y una larga ditadura, ya en plena democrazia y con un Estato autonomico que tanto ha contrebuyito á amillorar as condizions de vida d’os ziudadanos por tot ro país, plegó ro gran “sorollón” d’a nuestra zaguera (pero no ta cutio) crisis economica y financiera. Sí, ixa que ha escabonau tan duramén os alazez d’o estau sozial que ha guarenziata ra estabilidat d’Europa dimpués d’o trauma d’as dos zagueras guerras mundials. Ixa encara no superata crisis ha convertito ro que enzetó estando un conflito politico arredol d’o reparo d’o estatuto d’autonomía catalán en un movimiento de masas que clama por a independenzia de Cataluña. Una begata más, á penar d’os sieglos transcorritos, ta una parti pro considerable, talmén mayoritaria, d’o pueblo catalán, a puerta de salida á os más serios problemas torna á estar a independenzia. De nuevo, parixemos atrapaus en o tiempo.

Reconoxcamos que nos lo tenemos que fer mirar. Ye un fenomeno recurrén, endemico á ro largo d’a nuestra Istoria, y no pas solo os gubernans sino toda ra soziedat española eba d’interiorizar a nezesidat de no tratar á ra guingorria a nuestra diversidat y as suyas peculiaridaz (y no solo que as catalanas u vascas, que quede bien claro). En o caso de Cataluña emos d’estar consziens de dica qué punto a prespeutiva de “desconeutar” d’o Estau á que se pertenexe surte en o esmachinario coleutivo d’o pueblo catalán como una mena de balsamo de Fierabrás que tot lo cura. En ista ocasión os mals que la chustifican son basicamén a corrompizión, o aumento d’as desigualdaz, o paro, a esplotazión y precariedat laboral, o estabornamiento d’o Estau d’o bienestar, os desauzios, as puertas tornadizas, o bloqueyo á ras enerchías renovables, a baxa calidat d’a democrazia, a preservazión d’a propia luenga, ez. Ye innegable que en a sociedat catalana, cuan as cosas van mal u muito mal blinca ascape a ideya de que tot puede (¡debe!) estar millor si uno s’esfá d’o control d’un Estau que no se mira como ye de dar á ro intrés d’os suyos ziudadanos y, coleutivamén, á o d’a propia nazión que farchan. Una nazión que (y ista tampó no ye una custión baladí) no ye plenamén reconoxita en a bastida d’una España aconformata por una pluralidat d’identidaz de fundas radizes istoricas y culturals.

Femos mal en inorar iste feito, toda una amostranza d’a Istoria, mayestra d’a vida, que como ros malos estudians nos enzenegamos en olvidar y espernir. D’a mesma traza que fan mal os catalans en fer-la servir ta aconsiguir previlechios y aventaxas que no espleiten o resto d’os españols, cosa que -no s’engañe denguno- suzedeba con mayor intensidat y frecuenzia antis d’a instaurazión d’o Estau d’as autonomías. Y tamién en fan mal en Madrid cuan s’almiten ixas pretensions esclusivas. Pero más que más, se fa un mal sobre toz os mals posibles cuan desde Madrid refusan á clame-se Cataluña u clame-se cualsiquiera d’os coleutivos, rechions y nazionalidaz d’España ra posibilidat de dialogar sobre aqueras lechitimas demandas que, por a evoluzión d’os tiempos y a esperenzia, resultan esclateramén razonables y ventaxosas ta que podamos prosperar y convivir toz de traza adautata á os cambeos d’os tiempos. Con mayor razón cuan tenemos una bastida constituzional que sirvió bien á ras nezesidaz d’a nuestra transizión y a nuestra choven democrazia pero que, ta poder servir con eficazia á ra soziedat española d’o sieglo XXI, contempla vías que posibilitan -chestionatas por presonas que tiengan a debita altaria de miras y sentiu d’Estau- o suyo ordinatamén, pazién y susegata dialogato y pautato reparo.

Miguel Martínez Tomey

 Publicado en Aragón Digital el 17 y el 18 de noviembre de 2017

Anuncios