Manifiesto “Democracia Real Ya” en aragonés

MANIFIESTO “DEMOCRAZIA REYAL YA”
Semos personas normals e corriens. Semos como tu: chen que se debanta de maitins ta estudear, ta treballar u ta buscar treballo, chen que tiene familia e amigos. Chen que treballa firme toz os días ta bibir e dar un futuro millor á os que nos arrodeyan. Unos nos consideramos más progresistas, atros más conserbadors. Unos creyens, atros no. Unos tenemos ideolochías bien definitas, atros nos consideramos apoliticos… Pero toz semos permenatos e endinatos por o panorama politico, economico e sozial que beyemos arredol nuestro. Por a corrompizión d’os politicos, interpresarios, banquers… Por a inesfensión d’o ziudadano de pata plana.
Ista situazión nos fa mal á toz diariamén. Pero si toz nos unimos, podemos cambear-la. Ye ora de meter-se en mobimiento, ora de construyir entre toz una soziedá millor. Por ixo sustenemos con delera o siguién:
◦ As prioridaz de tota soziedá abanzata han d’estar a igualdá, o progreso, a solidaridá, o libre azeso á ra cultura, a sustenibilidá ecolochica e o desarrollo, o bienestar e a felizidá d’as personas.
◦ Esisten unos dreitos alazetals que aberban d’estar cubiertos en istas soziedaz: dreito á la bibienda, á o treballo, á la cultura, á la salú, á l’educazión, á la partezipazión politica, á o libre desarrollo personal, e dreito á o consumo d’os biens nezesarios ta una bida sana e goyosa.
◦ L’autual funzionamiento d’o nuestro sistema economico e gubernamental no atiende á istas prioridaz e ye un entrepuz ta o progreso d’a umanidá.
◦ A democrazia surte d’o pueblo (demos=pueblo; cracia=gubierno) asinas que o gubierno debe d’estar d’o pueblo. Manimenos, en iste país a mayor parti d’a clase politica ni sisquiera nos escuita. As suyas funzions eban d’estar a de portiar a nuestra boz á ras instituzions, fazelitando a partezipazión politica ziudadana meyante cauzes direutos e precurando o mayor benefizio ta o grueso d’a soziedá, no la d’enriquir-se e medrar á costa nuestra, atendendo nomás que á os ditatos d’os grans poders economicos e agafando-se á o poder á trabiés d’una ditadura partitocratica encapezata por as inamobibles siglas d’o PPSOE.
◦ L’angluzia e acorporamiento de poder en bels pocos chenera desigualdá, enueyo e sinchustizia, lo cual mena ent’a biolenzia, que refusamos. L’osoleto e antinatural modelo economico que nos riche atura a maquinaria sozial en una espiral que se sulse ella mesma enriquindo á bels pocos e zabucando en a pobreza e a escasez á o resto. Dica l’esboldregamiento.
◦ A boluntá e fin d’o sistema ye l’acamatonamiento de diners, primando-lo por denzima d’a eficazia e o bienestar d’a soziedá. Malmetendo recursos, destruyindo ro planeta, chenerando desemplego e consumidors infelizes.
◦ Os ziudadanos femos parti de l’engranache d’una maquina destinata á enriquir á una minoría que no sape ni d’as nuestras nezesidaz. Semos anonimos, pero sin nusatros garra d’isto no esistirba, pues nusatros mobemos o mundo.
◦ Si como soziedá aprendemos á no fiar o nuestro futuro á una astrata rendabilidá economica que nunca no recute ta ro benefizio d’a mayoría, podremos eliminar os abusos e mancas que toz sofrimos.
◦ Ye d’amenister una Reboluzión Etica. Emos meso os diners por denzima de l’Estar Umano e cal meter-lo á o nuestro serbizio. Semos personas, no pas produtos d’o mercau. No soi solo que lo que merco, por qué lo merco e a quí li’n merco.

Por tot lo debandito, soi endinato.
Creigo que puedo cambear-lo.
Creigo que puedo aduyar.
Sé que unitos podemos.
Sale con nusatros. Ye o tuyo dreito.